Postuar më : 31 Korrik 2017

Zmbrapsje totale të kultivuesve të kanabisit, sekuestrim aseteve kriminale

Fjala e Kryeministrit Edi Rama në takimin raportues në Zyrën Operacionale të Situatës të Task Forcës për zbatimin e Planit Kombëtar të Luftës për Parandalimin e Kultivimit dhe Trafikimit të Kanabisit:

Panorama e rezultateve të arritura është e qartë. Objektivi ambicioz për t’i dhënë fund kultivimit të kanabisit në territorin e Republikës së Shqipërisë, një fenomen që e njollos vendin tonë, është drejt realizimit të plotë. Nëse do të arrijmë të plotësojmë ashtu siç e kemi vendosur këtë objektiv, për nga pikëpamja e pastrimit të territorit nga feudet e kultivuesve të kanabisit, ana tjetër e medaljes është e gjitha për t’u parë më thellë e deri në fund, në kuptimin e evidentimit, ndalimit dhe ndëshkimit të elementeve kriminale që kanë përfituar në mënyrë krejtësisht të paligjshme shuma të mëdha parash dhe që posedojnë asete kriminale. 

Policia e Shtetit meriton një vlerësim të posaçëm në këtë proces, duke marrë parasysh se pavarësisht ngarkesës së shtuar nga fluksi i madh i turistëve, por edhe nga fenomeni i zjarreve, nuk ka pasur asnjë cedim në frontin e luftës kundër kultivimit dhe kultivuesve të kanabisit. Është e qartë që pavarësisht nga përpjekja e posaçme e Policisë së Shtetit ka ende autoritete vendore, prefektë, kryetarë të caktuar bashkish apo njësish administrative, që nuk janë shfaqur në lartësinë e kësaj sfide. E siç e kemi nënvizuar qysh në krye të herës, kur kemi lançuar planin e madh kombëtar për çrrënjosjen e kanabisit, nuk është vetëm sfida e Policisë së Shtetit, por një sfidë tërësore e të gjitha institucioneve dhe agjencive ligjzbatuese, madje dhe e shoqërisë.

Edhe prania e drejtorit të Drejtorisë së Përgjithshme të Parandalimit të Pastrimit të Parave në këtë takim nuk është e rastësishme, por shpreh domosdoshmërinë që lufta në këtë front të përshkallëzohet në drejtim të elementëve kriminale, të parave të krimit dhe të aseteve kriminale.

Është momenti që Policia e Shtetit të përgatitet për një operacion të madh kombëtar kontrolli të elementëve me rekorde kriminale në gjithë territorin e  vendit, që janë simbole të këtyre feudeve të kultivimit të kanabisit, por jo vetëm. Që kanë statusin e të fortit të zonës dhe që në këndvështrimin tim janë lehtësisht të evidentueshëm, lehtësisht të ndjekshëm penalisht dhe lehtësisht të goditshëm, përsa i përket aseteve që kanë në zotërim.

Mjafton që ky operacion, i cili duhet përgatitur me shumë kujdes dhe nuk duhet të bëhet pengesë në këtë fazë kulmore të sezonit turistik për lëvizjen e lirë të turistëve, menjëherë, me përfundimin apo me rënien e fluksit të turistëve, të vihet në zbatim duke kontrolluar automjetet e këtyre personazheve. Mjafton që këta elementë shumë shqetësues për komunitetet, shumë shqetësues për rendin dhe për sigurinë, shumë shqetësues për faktin se mishërojnë pandëshkueshmërinë e më shumë se një çerekshekulli, të vihen para përgjegjësisë për të justifikuar vlerat marramendëse të automjeteve dhe aseteve të tyre, që të bëhet transparencë. Nga kjo transparencë të përgjigjen aty ku duhet përpara prokurorisë dhe gjykatës.

Është koha për ta pastruar Shqipërinë, jo vetëm nga kanabisi, por edhe nga këto mikrobe të gjalla që kontaminojnë seriozisht organizmin e komuniteteve tona, kërcënojnë seriozisht sigurinë e njerëzve të zakonshëm të këtij vendi, familjarëve, banorëve në të gjithë territorin e vendit ku këto feude të kanabisit janë shprehja më kuptimplotë e domosdoshmërisë për të lidhur zhdukjen e tyre me goditjen pa mëshirë të këtyre elementëve kriminalë.

Policia e Shtetit ka gjithë informacionin e duhur. Kujtesa e Policisë së Shtetit është mjaftueshmërisht e pasur me emra, me bëma, me lidhje, me lëvizje të këtyre lloj mikrobeve, që të bëjë të mundur një operacion super të suksesshëm në këtë drejtim, për t’i dhënë një mesazh shumë të qartë komuniteteve, njerëzve të zakonshëm, që koha kur shteti ishte vetëm një alternativë e sigurisë së tyre dhe kur duhet ta kërkonin sigurinë, duke iu paguar renta si biznese, apo duke iu nënshtruar këtyre elementëve, ka marrë fund njëherë e përgjithmonë.

Edhe suksesi i qartë që po përvijohet në luftën kundër kultivimit të kanabisit, edhe pastrimi rrënjësor i hartës së Shqipërisë nga njollat jeshile të turpit që i vë vendit ky fenomen, tregon se vullneti i hekurt i Policisë së Shtetit, koordinimi i mirë me partnerët tanë italianë, që përfitoj nga rasti t’i falenderoj përzemërsisht, me shumë mirënjohje, për të gjithë ndihmën që na japin dhe po ashtu koordinimi me agjencitë e tjera kanë të gjithë potencialin për ta nxjerrë shtetin faqebardhë në përplasjen pa kompromis. Përplasje që duhet të fillojë në një shkallë të re me të gjithë elementët shqetësues të rendit publik, elementët shqetësues të qarkullimit rrugor, elementët shqetësues të mjediseve publike, elementët shqetësues pranë oborreve të shkollave, elementët shqetësues në dyert e hipotekave, që janë në një mënyrë, ose një tjetër, ose edhe drejtpërdrejtë, promotorë të këtij kriminaliteti që te kanabisi gjen shprehjen e vet më ulëritëse, ose të lidhur me këta lloj promotorësh. Jam i bindur që sot, Policia e Shtetit i ka të gjitha mundësitë ta bëjë këtë.

Dua që po ashtu të përgëzoj një aspekt shumë të rëndësishëm moral të të gjithë këtij operacioni, goditjen e elementëve brenda Policisë së Shtetit, që janë të lidhur me këtë veprimtari. Kjo duhet të shtrihet më tutje, me goditjen e elementëve brenda Policisë së Shtetit, që janë të lidhur, apo edhe më keq, të nënshtruar ndaj elementëve që përmenda më lart, ndaj feudalëve në hije, që shqetësojnë mjedisin tonë publik dhe jetën komunitare, duke bartur me vete pasaportën e zymtë të veprave kriminale dhe duke qenë vërdallë si hije kërcënuese për qetësinë publike dhe atë të familjeve, bizneseve e me radhë, të gjithë njerëzve që jetojnë në këtë vend, duke respektuar ligjin e duke respektuar komunitetin.

Besoj se pas një tjetër periudhe kohe, mendoj në 10-ditëshin e fundit të muajit, do t’i a vlente një tjetër azhornim me të gjitha rezultatet e deritanishme, për të cilat meritoni të gjithë vlerësimin dhe mirënjohjen time dhe të qeverisë shqiptare.

Shumë faleminderit!

Shkruaj Mesazh

Kontakto me Kryeministrin

Shkruaj Mesazh

Reportazhe Eksklusive

Dokumentarë

Reportazhe Eksklusive

Për Gazetarët

Hapësira Mediatike

Për Gazetarët

Raport publik

300 Ditë

Raport publik