N J O F T I M  P Ë R  A P L I K I M

 

PËR FUNKSIONIN E ANËTARIT TË KËSHILLIT DREJTUES TË AUTORITETIT TË KOMUNIKIMEVE ELEKTRONIKE DHE POSTARE (AKEP)

 

Në mbështetje të pikës 2, të nenit 14, të ligjit nr.54/2024 “Për komunikimet elektronike në Republikën e Shqipërisë”, Këshilli i Ministrave është institucioni përgjegjës për propozimin e anëtarëve të këshillit drejtues të Autoritetit të Komunikimeve Elektronike dhe Postare (AKEP), të cilët zgjidhen nga Kuvendi. Anëtarët e Këshillit Drejtues të AKEP-it emërohen për një mandat 5-vjeçar, me të drejtë rizgjedhjeje, jo më shumë se 1 herë.

 

Në përfundim të mandatit të njërit prej anëtarëve të këshillit drejtues të AKEP-it, Këshilli i Ministrave inkurajon personat që përmbushin kriteret të aplikojnë për këtë vend vakant.

 

• Aplikanti duhet të plotësojë kriteret, si më poshtë vijon:

 

1. Të jetë:

 

a. ekspert, me arsim të lartë, i kualifikuar, që ka, të paktën, 10 vjet përvojë pune;

b/ përfaqësues i sektorit të komunikimeve elektronike, postare, ekonomike dhe juridike.

 

2. Të mos jetë:

 

a. bashkëshorti ose i afërm, deri në shkallë të dytë, i anëtarëve të Këshillit të Ministrave;

b. dënuar nga gjykata për kryerjen e një vepre penale, me vendim të formës së prerë;

c. debitor, kreditor ose aksionar në një shoqëri, e cila i nënshtrohet kuadrit rregullator të Autoritetit të Komunikimeve Elektronike dhe Postare;

ç. i përjashtuar me ligj për të mbajtur poste publike shtetërore.

 

Aplikanti që do të emërohet në pozicionin e anëtarit të këshillit drejtues të AKEP-it duhet të japë dorëheqjen nga çdo post ose funksion zyrtar e partiak, të tërhiqet nga çdo veprimtari private fitimprurëse, si dhe të shesë e të shlyejë çdo interes financiar, që mund të ketë në shoqëri, që ushtrojnë veprimtari tregtare nën juridiksionin e AKEP-it.

 

• Dokumentet që duhet të dorëzohen janë, si më poshtë vijon:

 

• Kërkesë për aplikim;
• Kopje e letërnjoftimit;
• Curriculum vitae në gjuhën shqipe (secila faqe e firmosur);
• Dokumente të diplomimit (të noterizuara) si dhe dokumente të përvojës në fushat e kërkuara;
• Dokument që të provojë vjetërsinë në profesion;
• Vetëdeklarim se nuk është debitor, kreditor ose aksionar në një shoqëri, e cila i nënshtrohet kuadrit rregullator të Autoritetit të Komunikimeve Elektronike dhe Postare;
• Formular të vetëdeklarimit (të plotësuar e të firmosur), në zbatim të  ligjit nr.138/2015, “Për garantimin e integritetit të personave që zgjidhen, emërohen ose ushtrojnë funksione publike”, të ndryshuar;
• Formular të aplikimit (të plotësuar e të firmosur) për informim për zyrtarët përpara emërimit/zgjedhjes në poste të larta, në zbatim të ligjit nr.45/2015, “Për të drejtën e informimit për dokumentet e ish-Sigurimit të Shtetit të Republikës Popullore Socialiste të Shqipërisë”.
• Vërtetim nga Gjykata se nuk është i dënuar me vendim të formës së prerë për kryerjen e veprave penale.

 

(Deklarimi i rremë sjell përjashtimin nga çdo procedurë e mëtejshme e konkurrimit dhe përgjegjësi penale, sipas legjislacionit në fuqi.)

 

Afati i dorëzimit të aplikimit, deri më 12 janar 2026.

 

Adresa: Kryeministria

Bulevardi “Dëshmorët e Kombit”, nr.1, 1000

Tiranë, Shqipëri

 

Zyra e Sekretarit të Përgjithshëm