Shqipëri-Arabia Saudite, thellim miqësisë e bashkëpumimit të ndërsjellë

Deklaratë e përbashkët me Ministrin e Jashtëm të Arabisë Saudite, Princin Faisal bin Farhan Al-Saud: 

 

Kryeministri Edi Rama: Kemi kënaqësinë të kemi në Tiranë, një mik të veçantë, Princin Faisal bin Farhan, ministrin e Jashtëm të Arabisë Saudite, i cili viziton për herë të parë vendin tonë dhe ka ardhur drejtpërdrejtë nga Riad, për t’u rikthyer në Riad, vetëm për të rivënë kontaktet e drejtpërdrejta dhe për të ristartuar një proces bashkëpunimi të thelluar, për të cilin kemi vendosur piketat më pare, gjatë vizitës sime në Rihad dhe në takimin me Princin e Kurorës, Mohammed bin Salman.

Së pari dua t’i shpreh mirënjohjen Princit Faisal për gjithë përkushtimin në vazhdim që ai ka treguar për këtë marrëdhënie mes dy vendeve tona. Në fakt ka qenë ai që e ka mbajtur gjallë bashkëpunimin dhe komunikimin në kushtet, kur për shkak të pandemisë, kontaktet u vështirësuan jashtëzakonisht shumë dhe faktikisht, të gjitha shkëmbimet e planifikuara u paralizuan.

Kjo vizitë është një shenjë e drejtpërdrejtë që gatishmëria dhe dëshira e miqve tanë sauditë për të thelluar bashkëpunimin me Shqipërinë është e madhe. Ndërkohë që sëbashku e ndamë edhe kënaqësinë që numri i vizitorëve nga Arabia Saudite si turistë në Shqipëri ka pësuar një rritje të ndjeshme, edhe falë vendosjes së linjave direkte me Lindjen e Mesme, por edhe falë pikërisht nxitjes që vetë Princi i Kurorës dhe qeveria saudite i ka bërë kësaj marrëdhënieje.

Ne jemi shumë shpresëplotë që kjo vizitë e parë është vetëm hapja e një kapitulli vizitash dhe takimesh bilaterale.

Sot, unë ia ripërsërita ministrit ftesën për të pritur këtu, Princin e Kurorës dhe sigurisht, kjo lidhet me gjithë regjimin e lëvizjeve të Princit në kushtet kur vigjilenca ndaj rrezikut të COVID-it është e lartë. E po ashtu, e falënderova Princin Farhan, por përmes tij edhe Princin e Kurorës, edhe vetë Madhërinë e tij në Arabinë Saudite për ndihmën e vazhdueshme që Arabia Saudite i ka dhënë Shqipërisë, sidomos në momentet e vështira, sidomos kur ka qenë fjala për të qenë pranë nesh dhe pranë atyre më në nevojë. Nga ana tjetër, besoj që tanimë jemi në kushtet kur realisht mund të shohim me optimizëm në zhvillimin e marrëdhënieve tona, mundësitë e investimeve, mundësitë e rritjes së volumit tregtar mes dy vendeve, mundësitë e bashkëpunimit ekonomik në tërësi.

Ramë dakord me Princin Faisal për të mbledhur sa më parë Komitetin e Përbashkët, i cili u mblodh në 2019-ën, por pastaj u bllokua për shkak të pandemisë, pikërisht për të adresuar prioritetet në funksion të thellimit të bashkëpunimit ekonomik.

Nga ana tjetër ndamë edhe disa ide, sikundër dhe disa informacione, ndër të cilat dëgjuam edhe për nismën madhështore të Arabisë Saudite për rritjen e përmasës së gjelbër të gjithë Lindjes së Mesme dhe për një kontribut edhe në shkallë globale përmes projektit të mbjelljes së 50 miliardë pemëve. Sigurisht që ne do të ishim shumë të lumtur që të ishim pjesë e kësaj nisme, pavarësisht numrit të pemëve dhe sigurisht, në funksion të një axhende të përbashkët të të gjithë aleancës së vendeve për të përballuar sfidën e madhe të mjedisit dhe të ngrohjes globale.

E fundit, por jo për nga rëndësia, dua ta ritheksoj që Arabia Saudite e ka njohur Republikën e Kosovës dhe ka qenë një nga mbështetëset e rëndësishme në të gjitha përpjekjet tona të kandidaturës së Kosovës në institucione të ndryshme ndërkombëtarë. Patjetër që zëri i Arabisë Saudite është një zë me shumë peshë dhe ne do të vazhdojmë të bashkëpunojmë me Princin Faisal, i cili jemi vërtetë me fat që është sot në krye të punëve të jashtme të Mbretërisë Saudite për shkak të njohjes së thellë e të ndjeshmërisë së posaçme që ka për rajonin tonë.
Do bashkëpunojmë në mënyrë që të rrisim ndjeshmërinë dhe të rrisim edhe qartësinë e atyre vendeve të organizatës së bashkëpunimit islam e të Lgës Arabe që ende nuk e kanë njohur Kosovën.

Dua ta falënderoj me gjithë zemër ministrin e Jashtëm dhe mikun tonë, edhe për angazhimin e tij për t’i dhënë një shtysë të rëndësishme rritjes së komunikimit mes kompanive dhe për të krijuar një hapësirë ndërveprimi në sektorin privat, në funksion të interesave të ndërsjellta për të rritur investimet dhe volumin tregtar mes Shqipërisë dhe Arabisë Saudite.

Shumë faleminderit edhe një herë dhe me shumë kënaqësi po ju kaloj fjalën.

 

*Ministri i Jashtëm i Arabisë Saudite, Princi Faisal bin Farhan Al-Saud:

Faleminderit Shkëlqësi!

Mirëmëngjesi! Faleminderit që keni ardhur këtu.

Në fakt është kënaqësi e vërtetë për mua që kam ardhur këtu në Shqipëri, në këtë vizitë timen të parë, por ama shpresoj që kjo nuk ka për të qenë e fundit. Me kënaqësi kam pasur mundësinë që t’i kaloja të gjitha përshëndetjet e mia, Princit të Kurorës dhe të Mbretit nga Mbretëria e Arabisë Saudite për qytetarët e Shqipërisë dhe Mbretëria jonë e vlerëson shumë miqësinë me Shqipërinë. Një miqësi, e cila ka ecur për vite të tëra, por që është fuqizuar nga vizita e Kryeministrit të Shqipërisë. Pavarësisht se ne humbëm disa momente për arsye të pandemisë COVID-19 jemi shumë të kënaqur që ta vazhdojmë këtë bashkëpunim dhe të eksplorojmë mundësitë për të ardhmen në fusha të ndryshme, të shumëfishta.

Ne patëm një diskutim shumë të mirë sot, duke diskutuar për këto fusha bashkëpunim në të ardhmen, në fushën politike, ekonomike, të zhvillimit, mjedisore. Ka shumë gjëra që mund të bëjë Mbretëria e Arabisë Saudite në Shqipëri dhe ne me kënaqësi do të shikojmë se si do të mund t’i eksplorojmë këto mundësi në të ardhmen. Natyrisht, edhe mbledhja e Komitetit të Përbashkët, siç e tha dhe Zoti Kryeministër, që u mblodh për herë të fundit në vitin 2019, e rëndësishme këtu është që ne e kemi rritur nivelin, statusin e tij në një nivel ministerial, që do të thotë që në këtë formë do të shtohet dhe fokusi, vëmendja e punëve, në mënyrë që ne të mund t’i shfrytëzojmë të gjitha ato mundësi. Prandaj shpresojmë që ky Komitet të mblidhet sërish, shumë shpejt dhe tashmë që situata me pandeminë në të gjithë botën sikur po vjen e po stabilizohet, në mënyrë që ne të ndjekim të gjitha këto mundësi të cilat kemi menduar e ta zhvillojmë më tej miqësinë tonë, sipas natyrisht edhe orientimeve që do të kemi.

Dëshironim sot që të jepnim një sinjal shumë të qartë që jemi shumë të angazhuar për këtë marrëdhënie, për këtë miqësi. Ne besojmë tek kjo, besojmë po ashtu tek shanset, tek mundësitë që ne kemi dhe natyrisht, këtu është bashkëpunimi ekonomik, siç e tha dhe vetë Zoti Kryeministër.

Ne në fakt kemi një numër në rritje të turistëve që vijnë në Shqipëri nga Arabia Saudite dhe shpresojmë që ky numër do të vijojë të rritet e shpresojmë po ashtu që dhe shumë qytetarë shqiptarë të vijnë tek ne.

Një çështje e rëndësishme është në fakt edhe rritja e kontakteve ndërmjet vetë bizneseve. Ne duam shumë që bizneset ndërmjet dy vendeve tona të bashkëpunojmë me njëri-tjetrin, që të shfrytëzojmë të gjitha mundësitë që ekzistojnë jo vetëm në Mbretërinë tonë, por dhe në Shqipëri.

Ne po ashtu diskutuam çështje me interes të ndërsjellët në sferën politike, përshembull, për zhvillime të ndryshme në Lindjen e Mesme, folëm po ashtu për zhvillimet në rajon, por dhe në mbarë botën. Këtu ne kuptojmë që Shqipëria dhe Mbretëria jonë kanë në fakt, një qasje të përbashkët për sa i përket stabilitetit rajonal dhe sigurisë.

Ne folëm po ashtu dhe për anëtarësinë së afërmi në Këshillin e Sigurimit në OKB dhe folëm për agjendën e Shqipërisë dhe këtu Mbretëria e Arabisë Saudite do t’ju japë mbështetjen e plotë në anëtarësinë e Shqipërisë e ne do të bashkëpunojmë ngushtësisht me kolegët tanë nga Shqipëria dhe përfaqësuesit e Shqipërisë në OKB. Ne natyrisht do të japim të gjithë përkrahjen e mbështetjen tonë për të gjithë këtë agjendë të Shqipërisë.

Meqenëse Arabia Saudite ka në fakt, një program shumë ambicioz për vitin 2030. Me këtë vizion për vitin 2030, ne mezi presim që të bashkëpunojmë me të gjithë partnerët tanë në të gjithë komunitetin global, jo vetëm për begati për Mbretërinë tonë, por dhe për të gjithë bashkësinë globale. Shpresojmë që Shqipëria do të jetë partner kyç dhe e di që për Shqipërinë, mjedisi dhe mbrojtja e planetit është një përparësi e madhe kyçe, kritike. Kjo është e njëjta gjë dhe për ne dhe kohët e fundit, përshembull, ne kemi thënë, siç e tha dhe Kryeministri, nismën e gjelbër dhe këto janë iniciativa tepër të rëndësishme, për mbjelljen e pemëve, pra, ripyllëzimin e Lindjes së Mesme dhe mezi presim që të bashkëpunojmë me Shqipërinë në këtë aspekt.

Edhe njëherë dëshiroj të falënderoj Kryeministrin e Shqipërisë, ministren e Jashtme, por dhe të gjithë qytetarët e Shqipërisë që na kanë mirëpritur. Shpresoj që do të kemi shumë mundësi, jo vetëm për t’u rikthyer unë, por Shkëlqesia juaj, Zoti Kryeministër, ju keni angazhimin tim të plotë që ky angazhim i yni do të vijojë, pra, presim ende më të mirën.

*Përkthim simultan